Xosé Neira Vilas, Arraiano Maior da Raia Seca 2013

A Asociación Cultural, Ecoloxista e de Desenvolvemento Rural Arraianos nomea Arraiano Maior de 2013 a Xosé Neira Vilas

Na última asemblea de Arraianos, celebrada en Celanova o pasado día 16 de agosto, acordouse por unanimidade distinguir co recoñecemento de Arraiano Maior de 2013 a Xosé Neira Vilas (Gres, Vila de Cruces, 1928) pola súa traxectoria vital e literaria. A obra e a vida deste autor, que estivo emigrado na Arxentina e Cuba, transita entre a Galicia interior e a exterior, entre o mundo rural e o urbano, entre o pasado e o futuro dunha Galicia real e soñada, por iso entendemos que é merecedor desta distinción, que recoñece a obra literaria e o compromiso intelectual deste autor.

O acto de nomeamento do Arraiano Maior deste ano vai ser en Gres (Vila de Cruces), no salón de actos Fundación Xosé Neira Vilas, o sábado, 7 de setembro de 2013, ás 11 da mañá. O feito de facerse o acto de recoñecemento neste lugar responde a unha vontade de destacar o valor do rural e de trascender as fronteiras políticas, administrativas, físicas e mesmo mentais, nun espazo que é lindeiro entre concellos, cuncas fluviais e provincias. 

Autor: Baldo Ramos

Ao remate do acto, no que vai estar presente o Arraiano Maior de 2012, Xesús Alonso Montero,  quen vai facer entrega da aguillada arraiana a Xosé Neira Vilas, haberá un xantar popular no restaurante Casa Lodeiro, a de Rafael, onde imos degustar un menú típico da zona. Aínda que o acto vai ser público e a asistencia é libre, para anotarse no xantar popular haberá que porse en contacto cos membros do colectivo a través do correo electrónico xesusdiaz@gmail.com ou no teléfono 657425080, antes do martes, 3 de setembro de 2013.

Con este acto en Gres, no que colaboran a Fundación Xosé Neira Vilas e o concello de Vila de Cruces, o colectivo Arraianos continúa coa entrega das distincións anuais de Arraiano Maior, que comezaron no ano  2009, con Xosé Luís Méndez Ferrín, e continuaron cos nomeamentos do Padre Antonio Lourenço Fontes (2010), Bento da Cruz (2011), Xesús Alonso Montero (2012) e agora, con Xosé Neira Vilas (2013).

PROGRAMA DE ACTOS SÁBADO 7 DE SETEMBRO

NOMEAMENTO DE XOSÉ NEIRA VILAS ARRAIANO MAIOR

ACTO PÚBLICO-ENTRADA LIBRE

SALÓN DE ACTOS DA FUNDACIÓN XOSÉ NEIRA VILAS

11,00 Lectura do Manifesto Arraiano.

11,30: Visita á Fundación Xosé Neira Vilas.

12,15: Lectura de poemas e textos de Xosé Neira Vilas e música.

13,00: Nomeamento de Xosé Neira Vilas como Arraiano Maior de 2013, coa entrega do diploma, da pucha e da aguillada por Xesús Alonso Montero, Arraiano Maior de 2012. Intervencións do Arraiano Maior de 2012 e 2013.

14,00: Xantar Arraiano en Casa Lodeiro, a de Rafael (22 euros). 

Os interesados en anotarse no xantar popular terán que facelo previamente antes do 3 de setembro (xesusdiaz@gmail.com ou 657425080).